Google alltaf ferskir

Eflaust eru þeir ófáir sem gerst hafa sekir um að senda frá sér rafrænan póst í miklu hugarvíli, ofurölvi eða í öðru annarlegu ástandi. Leitarvél Google hefur löngum verið í fararbroddi hvað varðar leit að upplýsingum, klámi, Söru Palin eða Davíð Oddssyni. Nú er ekki fráleitt að ætla að Google muni bæta einni skrautfjöður í þjónustu netnotkenda og leysa vandamál sem þjakað hefur tölvunotendur síðan rafrænn póstur varð til.

Jon Perlow, einn af þeim sem þróuðu leitarvél Google, datt niður á hugmynd sem gæti komið í veg fyrir að milljónir manna sendi rafrænan póst í ölæði, sem betur hefði verið sleppt. Hugmyndina fékk Perlow eftir að hafa sjálfur, síðla kvölds, sent fyrrverandi kærustu sinni rafrænan póst þar sem hann viðraði þá skoðun sína að þau ættu að taka upp þráðinn aftur. Hugmyndinni var fálega tekið og féll ekki í kramið hjá kærustunni fyrrverandi. Perlow lét mistökin sér að kenningu verða og í frítíma sínum vann hann að forriti sem skyldi verða hinn „skynsami vinur“ í tölvunni, svipaður þeim sem tæki bíllyklana traustataki til að koma í veg fyrir að fólk aki undir áhrifum áfengis síðla kvölds.

Rafrænt áfengispróf
Forritið, sem Perlow nefndi Mail Googles, fer í veg fyrir póst sem sendur er með póstþjónustu Googles, Gmail, á ákveðnum tíma kvölds. „Það er þessi tími dagsins,“ segir forritið. „Ertu viss um að þú viljir senda þetta?“

Síðan reynir forritið að ákvarða hvort sendandi sé drukkinn með því að spyrja fimm stærðfræðispurninga, sem þarf að svara innan ákveðins tímaramma.

Án efa eru þeir ótal margir sem óska þess að þetta forrit hefði verið upphugsað fyrir löngu til að bjarga viðkomandi frá sjálfum sér.

„Svara öllum“
Í grein á vefmiðli Times segir af konu einni sem hafði orðið illilega á í messunni þegar hún síðla kvölds, eftir nokkur rauðvínsglös, svaraði boði í hóf sem fyrrverandi elskhugi, og upprennandi, bauð til. Konan sá að hann hafði einnig boðið fyrrverandi kærustu sinni, og lét hún í svari sínu í ljós þá heitu ósk að sú kona sæi sóma sinn í að þiggja ekki boðið.

„Að sjálfsögðu, í stað þess að svara eingöngu honum, ýtti ég á „svara öllum“. Ég sendi skilaboðin ekki eingöngu til hérumbil-kærasta míns, en einnig til barnsmóður hans og nýs sambýlismanns hennar, og í raun til svo gott sem allra meðlima stjórnmálasamtaka kærasta míns,“ sagði konan.

Nú um stundir reiðir fólk sig í sífellt meira mæli á tæknina. Einfaldur reikningur fer fram í huga fólks, sem síðan staðfestir útkomuna með hjálp vasareiknis. Útkoman er yfirleitt sú sama, en engu að síður virðist fólk ekki treysta eigin getu. Þau mistök að „svara öllum“ í stað þess að „svara“ geta reyndar komið fyrir hvern sem er, á hvaða tíma dags, og í hvaða ástandi sem er. En að „svara öllum“ getur haft slæmar afleiðingar á stundum. Ekki er alslæmt að fá rafræna viðvörun til að auka líkurnar á að rétt sé gert.

Að hrella sinn fyrrverandi
Stúdína við háskólann í Birmingham á Englandi sagði að eitt sinn hefði hún farið „gjörsamlega á sneplana“ ásamt vinkonu sinni. Þær ákváðu að hrella fyrrverandi kærasta sína með tilstill Facebook.
Þegar upp var staðið hafði hún sent sínum fyrrverandi „verulega sóðalega“ pósta. „Morguninn eftir vaknaði ég til harðyrtra, reiðilegra og meðaumkunarfullra svara frá mínum fyrrverandi, nýrri kærustu hans og bróður hans sem öll höfðu fengið póstinn frá mér.“

En það er önnur hlið á málinu og þar sem um er að ræða misnotara er einnig að finna hinn misnotaða. Og allir póstar sem sendir eru af fólki undir áhrifum eru ekki alslæmir. Framkvæmdastjóri stórs fyrirtækis í Lundúnum sagði að hún hefði að minnsta kosti fengið allt að tvær orðsendingar frá drukknu starfsfólki í hverjum mánuði. Sumir þeirra voru fullir af lofsyrðum: „Mér finnst þú glæsileg.“
„Í einum pósti sem ég fékk stóð: „Ef þú verður einhvern tímann þreytt á kallinum, þá er ég hér““. En aðrir voru grófir og jafnvel ógnandi.

Þessi framkvæmdastjóri telur póst af þessu tagi ekki alslæman. „Hver sá sem rekur fyrirtæki þarf að vita hvernig andinn er. Sumir fara með starfsliðinu á krá til að komast að því. Þessi máti er fljótlegri. Í raun má segja að viðvaranir komi í veg fyrir að fólk segi það sem það hugsar.“..